السلام عليكم ورحمة لله تعالى وبركاته تحيات
هَل العيد . . وانت ابعيد . . وآنه اوحيد . . لاوي الجيد
أعايد : ذكريات اسنين . أصافح طيفك امن ابعيد
ألف عالخير و مبارك
او فاضت بالفرح دارك
أدزلك على اجناح الروح : أشواقي او تهاني العيد
***
هل العيد . . وانت اهناك .. ترفل بالفرح وحدك
ونه ابمحراب آهاتي : أسلي ارويحتي ابصدك
أسامر : ذكريات اعزاز : ما إلهن قدر عندك
إشما أبني أمل وياك . . تبذل بالهدم جهدك
او تاليها ابعدت عني . . او نسيت اشكاتب ابعهدك
لاخط . لا بطاقة عيد . ما ظل أثر من ودك
عفت فد مره ليعزك
او حتى العيد ما هزك
شايف خير يا ولفي . . حنانك ما يصح بالأيد
أدزلك على اجناح الروح : أشواقي او تهاني العيد
* * *
هل العيد . . وانت اتزيد : جور او جفه او تاذيني
يمي . . او ساكن ابصفي . . او قريب اهوايه من عيني
لكن : غدت سبع ابحور . . تفصل بينك او بيني
او صرت حتى ابليالي العيد ميهلك تهنيني
او كل مطلع شمس يهواي . . بي أكثر تجافيني
واشم الملل بالفاظك . . يظالم من تحاچيني
كل هاي او گلت بالعيد
بوصالك اجروحي اتهيد
و بجيتك أهني الروح . . . و افتحلك سجل اجديد
او هل العيد . . وانت ابعيد . . وآنه اوحيد . . لاوي الجيد
* * *
هل العيد . . وانت اتريد : تبعد أكثر او أكثر
لفاني اموشل أفراحه . . إجاني او شافني اتحسر
كل ظني : تجيني وياه . . . او عن الهجر تتعذر
من العيد يا محبوب ؟ . . . متگلی بعد شکبر ؟
ترضه المخلص اليهواك . . . يوم العيد يتكدر ؟
و بگلبه لهيب النار . . لمواصلك . . . يتوجر ؟
يا سلوه الگلب و ينك ؟
أعايد من عگب عينك ؟
أحنّ اللمسة إچفوفك . . . او غيرك عيد أبد ما ريد
وادزلك على اجناح الروح : أشواقي او تهاني العيد
* * *
هل العيد . . وانت تعيش : بسرور او فرح عيدين
عيد الله الأغر . . او عيد : هجري او زيحتي امن العين
او هاي الناس كلها ابعيد . . . و انت التحتفل بثنين
او باچر لو خلص واحد ؟ . . يظل عيد الهجر كل حين
گلبك : أبد مو گلبك . غريب او مدري جاك امنين ؟
گلبك : ليش بدلته ؟
خسرته اخسرت عاطفته
شگلك بعد ؟ . . ما أدري . أگلك : خل أعيش اوحيد
أعايد ذكريات سنين . واصافح طيفك امن ابعيد
و أدزلك على اجناح الروح : أشواقي او تهاني العيد
يتبع